Sa taofia i le vaaiga a leoleo i le Aso Gafua le susuga Mau Hunt ina ua mae’a faia iai moliaga e ono e mafua i le tagi a le kamupani vaalele o le Samoa Airways.
O le Aso Gafua na oo atu ai le susuga Mau i le ofisa o leoleo i Apia e pei ona faailoa e lana loia, ina ua ia maua le tala e lē ua molia sa oo atu leoleo i lona aiga.
Ua faailoa e lana loia le susuga Unasa Iuni Sapolu e lua moliaga o le taufaaleaga, 2 moliaga o le faia o ni upu taufaifai ma moliaga e lua o le faia o se gaioiga faasoesa ua tuua’ia ai Mau e leoleo.
E pei ona silafia o se pepa o faamatalaga mai le kamupani vaalele i se vaiaso e le’i mamao atu na faailoa ai le teena e le pulega o le Samoa Airways o se faasalalauga a lē ua molia na ta’ua ai se pusamaliu na aumai mai Amerika Samoa i le tautua a le kamupani vaalele ae o lea pusamaliu sa aumai ai fualaau faasāina.
Sa ta’ua ai foi le iai o sea poo shares o le Pule Sili o le Samoa Airways i le kamupani vaalele o le Talofa Airways o se kamupani o loo galulue faatauvaga ma le kamupani vaalele a le atunuu.
O ia faasalalauga ua faaalia i le pepa o faamatalaga mai le Samoa Airways ua faaleaga ai le igoa ta’uleleia o le kamupani vaalele ma faaleaga ai foi le Pule Sili.
Le tamaitai loia, susuga Unasa Iuni Sapolu, ua tula’i mo Mau Hunt.
Sa taofia lē ua molia e leoleo i le aoauli o le Aso Gafua ae na toe tatala i le afiafi po o le aso lava lea.
O le Aso Tofi e tula’i ai Mau Hunt i le Faamasinoga Faaitumalo.
