I le tuanai o le fā tausaga talu ona aofia le faleaoga tulagalua o le afioaga o Vaigaga i le itumalo palota o Faleata 2, i le fuafuaga a le faletupe o le lalolagi e toe tuu i lalo ae fau se faleaoga fou ona ua lē toe saogalemu le faleaoga sa iai, o lea ua suatia nei le eleele e faatino ai le fausia o le faleaoga o le aoga tulagalua a Vaigaga, a o faaaogā ai laoa ma maota o le nuu o fale o le ekalesia EFKS a Vaigaga ma le maota o le sui faipule o le itumalo e faia ai vasega a le fanau.

O le faafeagaiga o le EKalesia Faapotopotoga Kerisiano Samoa i Vaigaga le susuga i le Toeaina Tautua Aurelio na taitai i le sauniga lotu o le sauniga o le suatia o le eleele.

Le susuga i le faifeau Toeaina o le EFKS i Vaigaga susuga Tautua Aurelio.

O le saunoaga a le taitai o le malo na faailoa ai e le tamaitai Palemia, o se tasi lea o faleaoga muamua i Samoa o le a faatupe e le faletupe o le lalolagi i le tau e 5 miliona 8 selau afe tala.

O le konekarate faufale mai Saina le Zheng Construction o le a latou fausia le faleaoga tulagalua o Vaigaga.

Le taitai o le Malo le afioga i le Palemia Fiame Naomi Mata’afa, i se vaega o lana saunoaga i le sauniga o le suaina o le eleele e faailoga ai le amatalia o le faluega o le faleaoga fou o le aoga tulagalua a Vaigaga. 

O se tasi lea o aoga tulagalua e silia i le fāselau fanau o loo aoaoina ai.

Faaalia e le Pule aoga e 475 tamaiti ma o nisi o vasega ua vaelua e pei o le tausaga muamua le Year One, o le vasega Tausaga Valu o loo ave e le ulu aoga e 50 ma ona tupu tamaiti ae tasi le faiaoga.

O le isi lea manaoga o le aoga tulagalua o ni faiaoga.

Le Pule Aoga o le aoga tulagalua a Vaigaga le tofa Fata Gasu Tafaomalo Sione.