Amata galuega mo le Forensic Audit

February 8, 2024
Samoa
Tusia: Lilomaiava Maina Misa Vai

Na faailoa e le alii Minisita o Tupe ia Lautimuia Afoa Uelese Vaai i le polokalame ma Tapuala o le EFKS TV i le po anapo, o lea ua oo mai le kamupani e faamautu aiaiga o le konekarate ma le ofisa o le Loia Sili auā lea galuega.

O lea kamupani sa manumalo mai tauofoga na faia ma ua mae’a pasia e le Kapeneta.

Na ta’ua foi e Lautimuia o le galuega lava ia e tolu masina ua atofa e faia ai ma o loo taumafai ia mae’a i totonu o le tausaga faaletupe lenei a o lei faamae’aina ia Iuni o le tausaga nei.

O loo galulue faatasi foi le vaega o le internal audit i le Matagaluega o Tupe ma lea Kamupani.

Na ta’ua e le alii Minisita e lē o faia lea galuega i le ofisa o le Matagaluega o Tupe ae ua mae’a ona saunia lelei le nofoaga e faia ai lea galuega ina ia mautinoa e lē faalavelaveina pe iai foi se feteenaiga i la latou galuega.

E tusa ma le 1 miliona tala na faataatia mai le tala faatatau o le tupe 2023/2024 mo le galuega lenei ma e silia i le 10 poloketi a le malo sa galulue iai le faigamalo talu ai lea o loo i le lisi o galuega a lea kamupani.

O nisi o poloketi o loo aofia ai e iai le:

Malaevaalele i Tiavea
O le tusigaigoa na tufatufaina ai le $50
O le faletalimalo o le Sheraton
O le lisi o le Samoa Airways
O falepuipui fou i Tanumalala ma Savaii
O le ofisa o le NPF i Salelologa Savaii
O le fale fou o le ofisa o faigapalota
O le poloketi o le School Net
Underground Cabinet Network Arrangement
O le uafu i Satitoa
O le faalavelave na tulai mai le Nafanua 2
Tax Invoice Monitoring System
O Komepiuta a le Matagaluega o Galuega
O taavale e lua na faatau mai a le MESC i le Scholastics Books
Faapipiiina o moli auala i Falelatai ma Samatau i le tausaga 2019 – 2020 faaaogā ai tupe a le EPC mo le faatosina o le palota.
O le amiotonu o le faaaogāina o foai e lē sa avea ma Palemia ma le Kapeneta faapea lē sa avea ma Faamasino Sili i lalo o le Civil List Act.
Unforseen and Unauthorised funds under the Act
Fonofaatonu o Tauofoga