O le Aso Gafua o le vaiaso nei le aso 30 o Setema na toe foi ai le tautua a le vaega o le falema’i mo oloa poo nifo i le maota gasegase i Motootua, i le tatala i le atunuu mo le 24 itula.
O se tasi lea o auaunaga tau soifua mālōlōina e mana’omia tele e tagata i le taimi e aafia ai oloa poo nifo i ni faaletonu aemaise i ni faalavelave faafuasei.
O se auaunaga foi e mana’omia tele i taimi o le po.
Ua faailoa e le matagaluega o le soifua mālōlōina i lana auala o fesoota’iga televavave, o itula faigaluega mai le 4 i le afiafi e oo i le 12 i le po, faapea le 12 i le po e oo i le valu o le aso e sosoo ai, ua na o gasegase ua i se tulaga faigata le tiga o oloa, ma faalavelave e tutupu faafuase’i.
O le nofoaga sa iai le numera valu poo le acute eight i le falema’i tuai sa iai, ua avea nei ma nofoaga autū o togafitiga o oloa poo nifo i le maota gasegase o Tupua Tamasese Meaole i Motootua.
