Ua molia e leoleo se talavou e 17 tausaga ina ua maliu ai se tamā e toalua si ana fanau lea na lavea i le taavale a le talavou lea i le itu i Saute i Sini i le vaiaso nei lava.
Ua faailoa e le 9News o le fetaula’iga ala i Preddys Road ma John Street i Bexley na tupu ai le faalavelave ma e foliga o si tamā lea na savali ane i le auala ae lavea ai i le taavale o le ituaiga o le Ford Falcon.
Na taumafai nisi sa iai i lea nofoaga e faia galuega laveai i si tamā na aafia peitai na maliu ai lava.
E manu’a mitimiti le 17 tausaga e pei ona ta’ua, ma fai mai leoleo na agai ese ina ua faato’ā tupu le faalavelave peitai na toe foi ane mulimuli ane.
Na pueina e leoleo ma avatu i le falemai e faia se siaki.
Ua ta’ua e leoleo ua molia i le avetaavale matautia ua mafua ai le maliu ma le lē tu ane i le taimi o le faalavelave atoa ai ma le avetaavale faatamala ua mafua ai le maliu.
Ua teena le tatala i tua ma e tulai i le faamasinoga o tamaiti i le asō.
Puna o Faamatalaga: https://www.9news.com.au/national/pedestrian-killed-after-allegedly-struck-by-teen-driver/26e2b3e0-7499-41ad-bb1d-1d94cdf3823d
