Ua iai ni suiga i le tau o oloa tau suāuu ma penisini mo le masina faai’u o lenei tausaga, e pei ona sa sosoo masina e lua o Oketopa ma Novema o pa’ū o latou tau, ae ua oo mai ia Tesema ua siitia tau o ia oloa.
Ua faailoa i se pepa o faamatalaga mai le matagaluega o tupe a le Malo ua mafua fesuia’iga o tau o fefaataua’iga o suāuu mo le masina mulimuli o lenei tausaga 2024 ona o le faatupula’ia o faafitauli o loo tula’i mai i Sasae Tutotonu faapea tulaga lē mautonu o le palota tele talu ai nei a le malo o Amerika.
O tau fou o le penisini e $2.88 sene i le lita, suāuu kiso e $2.99 sene i le lita ma le kalasini e $2.61 sene i le lita.
O tau tuai sa iai nei oloa i le masina o Novema o le penisinisi sa $2.81 sene i le lita, suāuu kiso sa $2.87 sene i le lita ma le tau tuai o le kalasini sa $2.51 sene i le lita.
O le faatusatusaga o tau o nei oloa i atunuu e pei o Niu Sila, Ausetalia ma Fiti e pei ona faailoa e le matagaluega o tupe a lo tatou malo o loo tula’i mai ai, o loo pito maualalo lava le tau o suāuu ma penisini i Samoa mo lenei masina o Tesema.
O Ausetalia o loo tala fitusefulu sene tupe Ausetalia i le lita poo le $3 tala tupe Samoa i le lita le penisini, o Niu Sila o loo $1.96 sene tupe Niu Sila i le lita poo le $3.11 sene Samoa, ma Fiti e $2.62 sene tupe fiti i le lita le penisini tusa lea o le $3.26 sene tupe Samoa.
E faapena foi i le tau o le suāuu kiso, o Ausetalia e $1.74 sene i le lita tupe Ausetalia poo le $3.2 sene tupe Samoa, suāuu kiso i Niu Sila e $1.99 sene i le lita tupe Niu Sila poo le $3.15 sene tupe Samoa ma Fiti o loo $2.18 sene tupe Fiti i le lita tusa o le $2.78 sene pe a faaliliu lea tau i tupe Samoa.
