Ua filifilia nei le tamalii sa avea ma faia’oga ulu o le ‘aulakapi a le Manu Samoa le afioga Vaovasamanaia Seilala Mapusua, e avea ma se tasi o faia’oga e lagolago i le tapenaina o le ‘aulakapi o le Moana Pasifika.
O se fiafiaga lea i le pulega o le ‘aulakapi aemaise o le faia’oga ulu, e pei ona lipotia ai e le leitio a Niu Sila.
Faaalia e Vaovasamanaia Seilala i lea ualesi faasalalau o se mitamitaga ia te ia le toe maua o se isi avanoa e faaaogā ai lona tagata i le atina’eina o alo ma fanau a le Pasefika i le lakapi e ala i le tofiga ua tuuina atu e galue ai i le ‘au o le Moana Pasifika.
E pei ona silafia o le tausaga e 2020 i le masina o Aokuso na filifilia ai Mapusua e avea ma faia’oga ulu o le Manu Samoa, ae o le mae’a mai o le Ipu o le Lalolagi i le tausaga na te’a nei 2023, na lē toe filifilia ai o ia e avea ma faia’oga ulu o le ‘aulakapi tele a lo tatou atunuu.
