I lenei vaitau o le finauina o le tāua o le siitia o avanoa tutusa o alii ma tamaitai i soo se tautua ma se auaunaga aemaise o le itu o le ola a’oa’oina, o lea ua molimauina i le atina’e o le taaloga lakapi i lo tatou atunuu le ausia e se tamaitai mo le taimi muamua o le tauaveina o le tofiga Pelesetene mo le iuni lakapi faaitumalo a Faasaleleaga i lo tatou motu tele o Salafai.
O le filifilia o le afioga Taulapapa Papalii Seumanu Tupuimatagi Jaclyn Mariner Salima e avea ma Pelesetene o lea iuni lakapi faaitumalo, o se matāti’a lea ua ausia e le itupā o tamaitai i Samoa i le atina’e o le lakapi.
Ua faaalia i le pepa o faamatalaga o se faailoga foi lea o le faamuamua a le iuni lakapi faaitumalo a Faasaleleaga o loo ave i le siitia o avanoa tutusa o tamaitai i le auai i le taaloga ma lotolotoi i le pulea ma le atina’eina o le lakapi.
Ua silia i le sefulu tausaga o auai le afioga Taulapapa i le uuna’ia o le tulaga lelei o le taaloga lenei mo alo ma fanau i le motu o Savaii.
