Ua toe faailoa e le afioga i le Fofoga Fetalai le susuga Papalii Li’o Oloipola Ta’eu Masipa’u, e leai sona malosi’aga faaletulafono e faia ai se faai’uga i le faagafuaina o nofoa o itumalo palota o sui faipule ua faia iai le faai’uga a le latou pati o le Faatuatua i le Atua Samoa ua Tasi, e lē toe avea ma o latou sui auai.
I se isi o pepa o faamatalaga mai le Fofoga Fetalai ua faailoa ai e le susuga Papalii e leai sona malosi’aga i lalo o le tulafono faavae ma le tulafono o faigapalota o le tausaga 2029, o tulafono tumau ma le tulafono o pule ma tulaga aloa’ia o le Palemene o le tausaga 1960.
Ua na o le faamasinoga ua iai lea malosi’aga e pei ona faailoa e le Fofoga o le Fono.
E pei ona silafia o le toe amatalia o tauaofiaga a le fono aoao faitulafono i le masina amata o lenei tausaga fou na faailoa ai le faai’uga a le Fofoga Fetalai ma lana saunoaga o se mataupu e patino i le vaega faaupufai sa auai o ni sui lagolago, ia faipule e to’aono e aofia ai le Palemia ma minisita e to’alima o le Kapeneta.
Ua faailoa foi e Papalii e leai se malosi’aga o ia tulafono uma e mafai ai e ia ona ave le mataupu i le faamasinoga.
O le tasi o mataupu ua faasa’o ai e le Fofoga Fetalai ni lipoti sa faasalalau ai o le fono a le komisi a le Palemene na usuia a o le’i tauaofia le fono usu a Samoa i le aso 21 o Ianuari o le fono masani e faatulaga ai galuega a le Palemene mo le tausaga, ae e le’i talanoaina ai le mataupu i le va o le fogāvaa i le lotoifale o le vaega faaupufai o le Faatuatua i le Atua Samoa ua Tasi.
O le Aso Lua o le vaiaso fou e toe tauaofia ai le fono aoao faitulafono mo ana galuega masani.
