E telē se faasalaga tupe ua lipotia ua totogi e le Uber Australia ina ua mae’a se suesuega na faia i spam emails sa lafoina i ana paaga.
Tai pei lava foi o le mataupu na aafia ai le Ticketek lea sa lipotia atu i talafou i le vaiaso talu ai, lea la foi ua ‘aia ai ma le Uber Australia mai le Australian Communications and Media Authority le ACMA.
O le suesuega na iloa ai sa lafo e le Uber le silia ma le 2 miliona o imeli e faatatau i le maketiina o le pisinisi i ana paaga i le aso e tasi i le masina o Ianuari, o se vaega lea o ni a latou campaign sa faia mo se auaunaga e kiliva sa’o ai ni avamalosi i aiga.
O ia imeli ua lafoina e aunoa ma subscribe pe lesitala iai o paaga ma sa lafoina foi i isi paaga ua lē o toe lesitala i le auaunaga.
Ua iloa i le suesuega a le ACMA ua solia ai e le Uber le tulafono ona o loo faaigoa ia imeli e lē o ni mataupu faapisinisi.
O le tali a le Uber e pei ona iai i le lipoti o se sasi poo se mea sese na afua ai ona lafo ia imeli ma ua faatoese ai i le faaletonu.
I lalo o le Spam Act e manaomia ai pisinisi ia maua muamua le ioega mai paaga ona faatoa faataga lea ona lafoina iai ni a latou faalauiloa faapisinisi i paaga poo customers.
