Ua faamaonia e le fono aoao e ala i lana tauaofiaga i le taeao nei le filifilia ai o sui usufono e fai ma sui o Komiti faapalemene na tofia ai le afioga a Vaele Paiaaua Iona Sekuini lea ua tu’umalo.
O ia sui usufono e aofia ai le tōfā Seuāmuli Fasi Toma lea ua filifilia e avea ma sui o le Komiti faapalemene o tulafono tumau mataupu tau faigapalota, talosaga ma tofiga faale faavae. O le Komiti lona lua o le Komiti o Tupe Maua ma Tupe Totogi lea ua filifilia ai le tōfā Mulipola Auapaau Aloitafua Mulipola.
Na faatūina e le taitai o le atunuu afioga Fiama Naomi Mataafa le lafo e faamaonia ai le filifilia o le tōfā Seuamuli Fasi Toma e avea ma sui o le Komisi suesue ma na faaluaina e le Sui Palemia ma le Minisita o Faatoaga ma Faigafaiva.
E pei ona silafia o le afioga Vaele Paiaaua Iona Sekuini na tuumalo faafuse’i i le masina na te’a nei ma sa fai ma usufono o le itumalo Gagaifomaua No.2. I le fonotaga i le taeao nei na fai ai se tula’i faaaloalo poo se moment of silence e manatua ai le afioga ia Vaele ma lana tautua foi i le Palemene o le atunuu.
