Ua faailoa mai e le minisita lagolago o le Soifua Maloloina o David Seymour o lea ua toe tuuina i fata o faletalavai isi fualaau ma vailaau poo medicines e togafiti ai le flu, medicine ia e aofia ai ma le pseudoephhedrine lea sa faasā e le malo ona toe faatauina ona o le vailaau lea o loo faaaogā i le gaosiga o le aisa.
O le taimi nei la e pei ona lipotia e le One News ua mafai ona faatau ia oloa mo le flu e aunoa ma se talavai poo le prescription e ui e faato’ā mafai ona faatau pe a mae’a ona faatalanoa ma se talavai ona o loo faamauina pea o se oloa e iai ona tapulaa.
O isi vailaau ma fualaau mo togafitiga o le flu e aofia ai le Nurofen, Codral, Sudafed, Demazin ma isi, ua mae’a uma ona ioeina e le Medsafe mo le faaaogāina.
Fai mai le minisita o se mapusaga foi lenei mo tagata e aafia i le flu ma o le a maua vailaau e pei ona iai i Ausetalia, Kanata, UK ma Amerika.
O le 2011 na amata faasā mai ai le toe faatauina o ituaiga vailaau ma fualaau lea e aofia ai le vailaau lea o le pseudoephedrine ona o popolega o loo faaaogā i le gaosiga o le aisa e pei ona alia’e ai foi popolega o isi faletalavai e ono toe siitia ai foi le numera o faalavelave e mafua mai i le fualaau faasāina o le aisa poo le methamphetamine.
Puna o Faamatalaga: https://www.1news.co.nz/2024/05/20/cold-and-flu-meds-with-pseudoephedrine-now-back-on-the-shelves/
