Ua toe faaopoopo mo le isi 12 masina le umi o le a iai vaega’au o le puipuiga a Niu Sila i le Atu Solomona. O se lipoti i le NewsHub i le asō ua ta’ua ai lea tulaga i le mae’a ai o le fonotaga a le Minisita o le Va i Fafo, Nanaia Mahuta ma le minisita o le Foreign Affairs and External Trade a le Atu Solomona, Jeremiah Manele.
Tusa ai o faamatalaga mai le matagaluega o le va i fafo ma fefaatauaiga ua toe faamanatu ai e le minisita popolega e faatatau i le maliega na sainia e Saina ma le Atu Solomona ma le faamautinoa ane e le minisita a le Atu Solomona o le a lē oo lea maliega i se nofoaga faamiliteli o Saina i le motu.
Fai mai Mahuta i le lipoti lea o le faiga faapaaga o loo iai nei ma ia atunuu ina ia unaia ai le nofo filemu e lē gata i le galulue faatasi i tulaga tau le puipuiga ae faapea foi i nisi o lu’itau faaletamaoaiga o feagai ma atunuu. O se tasi vaega tāua e aofia ai suiga o le tau ma nisi vaega e manaomia ona faaleleia.
O le 2021 i lona faaiuiuga na auina atu ai e Niu Sila sui o lana vaega’au i le laumua o le Atu Solomona, o Honiara e fesoasoani i le faafilemuina o vevesi na tulai mai i le atunuu i lea taimi.
