Ua lē manuia le talosaga apili a Lema’i Faioso Sione o loo tuli nei lona faasalaga faafalepuipui, sa ia toe finau ai e iloilo le faai’uga a le Faamasinoga Maualuga na faamaonia ai lona moliaga o le taupulepule e faaoo le maliu i se isi tagata, ma le faai’uga na faamaonia ai lona moliaga.
O le afioga i le Faamasino Sili na fofogaina le faai’uga a le faamasinoga o talosaga toe iloilo, ma ia faailoa ai o le teena o le talosaga apili e Lema’i Faioso Sione, na pau lea o le vaega o le faai’uga e mafai ona faasalalau mo le silafia e tagata, ae o faamatalaga uma i finauga sa tuuina atu e lagolago ai le apili o le a tapu pe faasā ona faailoa lautele.
Ua mafua lea tapu ona o loo loma se aso e su’esu’e ai moliaga o Talalelei Pauga o loo tuua’ia foi i le moliaga o le taupulepule e faaoo le maliu i lē sa avea ma Palemia le susuga Tuilaepa L Sailele Malielegaoi.
Mo le silafia o loo taoto nei i le faamasinoga lea mataupu faasaga ia Talalelei Pauga lea na aumai faapagota mai Ausetalia e tali i lona moliaga.
O Malele Atofu Paulo ma Lema’i Faioso Sione na molia faatasi ma o Aokuso o le tausaga na te’a nei, na lauina ai le faai’uga mo i la’ua e pei ona faasala ai Lema’i i le 4 tausaga ma le 6 masina i le falepuipui, ae o Malele Paulo e 4 tausaga le umi o lona faasalaga.
O Taualai Leiloa le isi taulealea o loo tuli foi lona faasalaga i le mataupu lava e tasi sa molia ai Lema’i Faioso Sione ma Malele Atofu Paulo, ma ua tālia nei le su’esu’eina o moliaga o Talalelei Pauga o loo tatala i tua i ni aiaiga e faatali ai le aso o lona faamasinoga.
