Ua faalautele le auaunaga a se tasi o charity i Niu Sila e ala i le tuuina atu o ni taavale a le falema’i e 16 mo le faaaogāina i Ukraine.

Na ta’ua e le One News, o se vaega aupito tele lea o taavale a le falema’i ua aveina atu mai le atunuu e le Kiwi K.A.R.E. poo le Kiwi Aid and Refugee Evacuation o se faalapotopotoga e ta’ita’ia e Tenby Powell.

Ua faamauina na taunuu le uta tele lea i Siamani i le Aso Faraile talu ai ma faaoo atu ai i Ukraine.

O  le tali atu lea i le valaau a Ukraine mo ni taavale a le falema’i e fesoasoani ai i le fela’ua’iga o tagata manunu’a aemaise o osofa’iga i falema’i ma nofoaga faafoma’i ma isi.

E ui e lē o ni taavale fou peitai ua faailoa i se lipoti mai Ukraine o loo i se tulaga lelei tele taavale na auina atu e ui ua silia ma le ta’i 200 afe kilomita ua mae’a faaaogāina.

I le masina o Aokuso o le tausaga talu ai na kiliva ai foi e le Kiwi K.A.R.E. isi taavale e fitu na faatumu i sapalai o mea tau le soifua mālōlōina ma auina atu foi i Ukraine.   

Puna o Faamatalaga: https://www.1news.co.nz/2024/08/13/nz-charity-sends-its-largest-number-of-retired-ambulances-to-ukraine/