Ua iai nei se tamalii e talavou lona soifua ma ua faaipoipo e toalua ona alo ae e iai ona aafiaga tumau e pei ona ia faaaogā ai se nofoa faatavalevale, ua sii lona aao e fia tauva i le tofi faipule o le Palemene i le isi palota tele a le atunuu i le tausaga e 2026.
O le afioga Salamatua Russell Young Yen ua ausia se tasi o laasaga o lona olaga o le faagaioi o sana pisinisi faatau fanua, ma sa oo foi lona olaga a’oa’oina i se tulaga maualuga e pei ona sa a’oa’oina i le aoga o le Loto Taumafai.
O se faatalanoaga ma lea tamalii talavou na ia faailoa ai lona manao e fia ofi i le taaloga o polokiki i upufai o le Malo e ala i le tofi faipule, ona e talitonu o ia, e leai se tuaoi o mea lelei, ma ua ia manao e fai se sao o tagata e iai aafiaga tumau i faalagamaea o upufai o le Malo.
O se faatalanoaga ma le afioga Salamatua Russell Young Yen o se tasi e iai ona aafiaga tumau lea ua amata tapena mo le palota tele o le 2026.
