Ua faatino nei e le kamupani telefoni feavea’i ma fesoota’iga televavave o le Vodafone Samoa se tapenaga lea e iai le talitonuga afai ae manumālō, o le a avea ai Samoa o se atunuu laitiiti na te maua le faailoga sili ona taualoa i le lalolagi o le Nobel Peace Prize.

O le faalapotopotoga o le Toomaga mo Ē Puapuagatia ma lana auaunaga ua aulia nei le 20 tausaga, ua avea ma faalapotopotoga ua agavaa mo le filifiliga o lea faailoga taualoa.

Ua faailoa ai e le alii Pule Sili o le Vodafone Samoa o Rana Bose e agavaa le Toomaga mo Ē Puapuagatia i aiaiga e mafai ai ona tuuina atu se faalapotopotoga tuma’oti o faia ni galuega fesoasoani mo le manuia o tagata e na te maua ai lea faailoga taualoa.

E tasi le miliona tala Amerika le faailogatupe e maua pe a manumālō.

E lē gata ina faailoa e le Pule Sili o lea kamupani le ave e le Vodafone Samoa o le auaunaga a le Toomaga mo le filifiliga o lea faailoga, ae ua sainia foi e le Pule Sili o le kamupani ma sui o le komiti faafoe o lea faalapotopotoga tuma’oti lana lagolago e tusa ma le $42 afe lona tau atoa, e lagolago ai i polokalame o loo tapena o le faailogaina o le 20 tausaga talu ona faavae le Toomaga mo Ē Puapuagatia.

O aoga tulagalua i le atunuu o loo aofia i le polokalame e ala i le tauvaga o tusigatala ma solo e faatatau i le tautua ma le auaunaga a le Toomaga i Samoa.

O Iuni o le tausaga nei e faailoga ai le 20 tausaga ma taualuga iai polokalame o loo faagasolo.