Ua faatūina nei se matati’a mo le ulua’i taimi e le ausoka a tamaitai Samoa i le matutua e i lalo o le 16 tausaga, o le saofagā atu lea pe qualify e tausinio i se taamilosaga faavaomalo o le Ipu o le Lalolagi a le pulega o le taaloga soka i le lalolagi le FIFA.
O le Aso Tofi o le vaiaso nei i Suva i Fiti na faagasolo ai le taamilosaga saili avanoa a ausoka a tamaitai i le li’o o atunuu o le Oceania i le matutua ei lalo o le 16 tausaga, i le faamoemoe e saili ai le avanoa e sao atu ai i le taamilosaga o le Ipu o le Lalolagi i le matutua e i lalo o le 17 tausaga i le vaega o tamaitai.
O lea taamilosaga e faia i le atunuu o Morroco i le tausaga fou.
Na taalo le ‘au a Samoa ma Niu Kaletonia ma manumalo ai i le 2 ‘ai i le leai.
Faaalia i faamaumauga a le pulega o le taaloga soka a Samoa, na pau le taamilosaga na maualuga ai le taumafai o Samoa i le taaloga soka, o le taamilosaga a atunuu o le Oceania le OFC i le vaega o le matutua e i lalo o le 20 tausaga i le vaega lava o tamaitai, na tulaga 2 ai i le tausaga e 2016 ae tulaga 3 i le tausaga na te’a nei 2023.
O ia tausaga sa sao atu ai foi Samoa i le taamilosaga mo le saili avanoa i le Ipu o le Lalolagi i le soka a tamaitai i le matutua o le Under 20.
