O Fepuari o le tausaga e 2020 a o tapena le palota tele a le atunuu o le tausaga e 2021, na faamuta ai le avea o le susuga Lomia Safuneituuga Tauloa Sia’aga ma pulenuu poo le sui o le nuu o Fatuvalu i Safune.

O se faai’uga na faamatala e lea tamalii na faia e le Matagaluega o Tina ma Tamaitai, Atina’e o Afioaga ma Agafesoota’i e aunoa ma se tusi e faailoa atu ai le mafuaaga.

O se faai’uga foi na faatino e aunoa ma le tāpā e le matagaluega o se faamatalaga a lē sa avea ma sui o le nuu o Fatuvalu i lea taimi.

Peitai i se feiloa’iga sa faailoa ai e Lomia na pau le faamatalaga na avatu o lona soli fono i le fono masina a sui o nuu ma le matagaluega ua mafua ai ona faamuta lona tofi.

Sa faailoa lava e lea tamalii o le fono masina na mapuna mai ai lea tuua’iga, sa faailoa ai sona lagona ma ia faailoa i sui o le matagaluega sa auai i le fono, o ia o se sui e lagolago i le vaega faaupufai o le Faatuatua i le Atua Samoa ua Tasi, a o loma le palota tele o le 2021.

O lona talitonuga o le mafuaaga lea na faamuta ai lona toe avea ma sui o le nuu.

Ina ua faia lea faai’uga na tele ni aafiaga na feagai ma ia, e pei ona sa faasala o ia e lo latou nuu.

Sa ia tūtū aai pea e saili le mea moni ma tāpā ai sana loia mo le faia o se galuega faaletulafono, ma o lea galuega ua taunuu i se feutana’iga ma le matagaluega faapea le ofisa o le Loia Sili a le Malo.

O su’esu’ega na faia e toe saili ai le amiotonu na faamautū ai, e solitulafono le faai’uga na faamuta ai le tofi o lea tamalii, ma ua totogi ai e le matagaluega o tina ma tamaitai atina’e o afioaga ma aga fesoota’i le 15 afe o le totogi atoa lea o masina e 10 o le tausaga e 2020 e lei toe maua, faapea ma totogi uma o le tausaga e 2021, 2022, 2023 e oo mai i le tausaga nei e 2024.

Ua totogi foi e le matagaluega le pili a le loia sa finauina le mataupu a Lomia, e 2 afe lima selau tala.

E 250 afe le taui sa tapena lea tamalii ma lana loia e finau ai le mataupu i le faamasinoga peitai na faaalia e Lomia o le 15 afe ma le totogi o lana loia ua lava lea mo ia, ona e lei finau e saili ai ni tupe ae sa finau e saili le faimeatonu.

Le susuga Lomia Safuneituuga Tauloa Sia’aga i se faatalanoaga i le faai’uga o le vaiaso.