O le auaunaga a le faalapotopotoga tuma’oti o le Toomaga mo ē Puapuagatia na sulu iai se taulealea mo se fesoasoani, ona o le mamafa o le togisala a le pulega o le latou nuu.
Na faasala lea taulealea i le 100 aumatua ma le tasi le afe tala, peitai e na te lē gafatia.
E lē o faailoaina e le Pelesetene o le Toomaga i se lipoti a le nusipepa o le Samoa Observer pe aisea na faasala ai lea tama tane e le pulega a matai o le latou nuu, ae o le fautuaga a le Pelesetene le faletua o Siliniu Lina Chang, e tatau i le nuu ona faaaogā nisi auala e faatino ai le togisala e pei o le galue i se faato’aga a se faifeau poo se isi galuega e fesoasoani ai i se aiga o le nuu, ae lē o le faia o faasalaga mamafatū e lē mafai ona faatino pe a fua i le limavaivai o se tagata e aafia i se faasalaga a le nuu.
