Ua ioeina nei e le Pulega a le Lakapi ale Lalolagi se suiga i tulafono o loo leoina le taaloga lakapi ile mataupu faatatau i au a atunuu, national representation lea ua faataga ai nei se tama taalo faavaomalo e transfer pe suia mai leisi iuni i leisi a ia faamautu se sootaga ma lea iuni e ala i tulaga o tupuaga.

Amata atu ile aso muamua o Ianuari o le tausaga fou, ina ia mafai ona transfer se tama taaalo mai leisi iuni I leisi i lalo o suiga ia , regulation 8, e manaomia e le tagata taalo ona ausia aiaiga e pei ona faamanino mai

E tatau ona faamalolo mai le tama taalo mai lakapi faavaomalo mo le 36 masina, o le tagata taalo e tatau ona sa fanau ile atunuu o loo fia transfer iai pe sa soifua ai foi  se tasi o ona matua poo matua o ona matua.

I lalo foi o lea aiaiga e nao le faatasi ona mafai ona faataga le suia o se iuni a le tagata taalo ma o le a muai sailia lava le ioega mai le Komiti e feagai ma le iloiloga o lea mataupu. A maea le aso muamua o Ianuari o le tausaga fou o souse tagata taalo e ausia tuutuuga e pei ona faataatia mai, ua mafai loa ona talosaga mo se transfer.

O se mataupu ua loa ona tulituliloa e le tele o tama taaalo aemaise foi nisi o pulega .Fai mai le taitaifono o le World Rugby Sir Bill Beaumont ile lipoti a le rugbydump.com o le ioeina poo le pasia o lenei suiga o le faaiuga o se mataupu sa faatalanoa auiliili ma faalauaitele ma sa faalogologo foi I finagalo faaalia o tama taaalo mae manatu o se faaiuga tonu lenei ua ave ai foi le faamuamua I tama taaalo ma faalautele ai pea le faagatama o le lakapi ile lalolagi.