O le tausaga fou lea ua lipotia mai o le a suia ai le igoa o le kamupani telefoni a le Vodafone i le One NZ. Ua faailoa mai lea faamatalaga i le mae’a o le faatauina o le Vodafone i le kamupani Infratil ma le kamupani mai Kanata le Brookfield Asset Management lea fai mai le televise a Niu Sila e 3.4 piliona na faatauina ai.
I le taimi na faatino ai lea tulaga na ta’ua ai e le faauluuluga o le kamupani i lea taimi Jason Paris sa iai le faamoemoe o le faatauina o le kamupani o le a mafai ai ona faalautele ana auaunaga agai atu i faiga faaonaponei digital platform, ae ua ia ta’ua i le aso ananafi, o le toe suia o le igoa o le kamupani o le isi lea laasaga i suiga ua faia.
O lona uiga o le a tele atu tupe e inivesi ia latou sootaga poo networks, auaunaga i le atunuu aemaise o faiga faatekonolosi mo paaga i Niu Sila nei.
Fai mai le alii pule e iai lo latou manatu o le suia o le igoa o le kamupani i le One NZ o le a atagia lelei ai sootaga loloto ma lona talaaga i Niu Sila aemaise o fuafuaga agai atu i le lumanai.
