O le alalaga ma le pepese a le atunuu ma le tapua’iga a ekalesia ma aiga sa auai i le tauvaga pese a le Musika Moana Choir Competition aemaise o ekalesia sa iai lo latou sao i lenei faamoemoe i le Aso Toonai ua mavae, ua sili atu mea ua latou vaai iai nai lo mea sa latou faalogo iai a o lei faataunuuina le tauvaga.
O le tapisa ai o le atunuu i lea tulaga ona ua latou molimauina le tulaga mata’ina ma le maoa’e o tapenaga a aufaipese sa auai.
E lē gata i tapenaga i togiga ae o le sauniga o pese filiflia a le aufaipese lava latou ae faapea foi i le pese filifilia o le tauvaga.
E iva aufapese sa auai i le tauvaga muamua lenei, e pei ona talamalae ai le aufaipese a le Sinoti Samoa Mission Choir, ona sosoo ai lea ma le aufaipese St Paul’s Presbyterian, o le Auckland Pasifika Voices, Magele i Sisifo Youth Choir, Maamaloa Chamber Choir, EFKS Grey Lynn, Ascension, EFKS Aukilani Youth Choir ma Magele i Sasae Puaseisei EFKS Choir.
Na maualuga ma mati’e le faamoemoe ina ua masii atu le fala siigata i le tapua’iga a le aufaigaluega totofi a le Atua ma o latou faletua ae faapea foi le faamalumaluga o le tapua’iga a susuga i faafeagaiga mālōlō faapea aiga ma ekalesia sa molimauina lea tauvaga tele.
E ui i le laitiiti o se taimi na tapena ai lenei tauvaga ae sa iloga ona vaaia le tali atu o aufaipese sa auai e ala i le matagofie o togiga, ae faapea foi i pese sa filifilia, aemaise ai o le sui fefiloi o aufaipese ta’itasi i tamā ma tina matutua faasolo ifo lava i fanau talavou ma le to’atele o sui o aufaipese lea e silia i le 50 tagata pepese.
Ae pei ona saunoa le afioga i le faatonu o lenei polokalame ia Fepuleai Helen Tupai, e maofa lona loto i le tulaga ua iai le ulua’i tauvaga a le Musika Moana Choir Competition i lenei tausaga.
E ese ma le manaia o tapenaga a aufaipese uma, leai se mea sa faaletonu ae o i ua toe fafagu mai ai lagona o mātua i aso la o le una’ia lea o fanau i aufaipese a ekalesia e faaaogā ai lo latou ola mo le Alii.
E leai se tasi na lagona se vaivai i lea aso aua na faanofo malie lagona o tagata e le fofoga o le aso le alii o Tofiga Fepuleai.
O aufaipese e lima pito i luga sa fai aga’i iai le laugatogi, e pei ona iai le aufaipese a le Maamaloa Chamber Choir sa tulaga lima sa mauaina le faailoga tupe e $2,000, o le tulaga fā sa iai le aufaipese a Sinoti Samoa Mission Choir na mauaina le faailoga tupe e $3,000, o le tulaga tolu ua iai le aufaipese a le Ascension na mauaina le faailoga tupe e $5,000, tulaga lua ua iai le aufaipese a le EFKS Magele Sasae Puaseisei na mauaina le faailoga tupe e $7,000 ma le siamupini o le tauvaga o le EFKS Aukilani Youth Choir mauaina le faailoga tupe e $16,000.
O le aufaipese lea a le EFKS Aukilani Youth Choir na amata mai i le ekalesia a le susuga i le faafeagaiga ia Rev Iosefa Tiata i Mt Roskill ona tatala lea o le avanoa i le matagaluega a Aukilani poo ai ni sui e fia auai lea sa maua ai loa le avanoa e isi o ekalesia a le Matagaluega Aukilani e tuufaatasia ai lenei aufaipese to’atele, ae sa iai foi sui mai isi ekalesia e pei o le Katoliko ma le Metotisi.
O le tāua o lenei tauvaga i totonu o le matagaluega a Aukilani ua mafai ai ona galulue faatasi tagata uma ua lē gata i tagata lolotu ae faapea foi i susuga i faafeagaiga aemaise o le maua ai o avanoa ma nisi o ekalesia e militino na galulue i le talalelei a le Atua.
