O loo loma feiloaiga a isi vaega faaupufai poo pati o le Palemene a Niu Sila ma le tafatolu o le Mau o le Sitiseni a Samoa i Niu Sila, lea e aofia ai le Fono Faufautua a Samoa i Aukilani, Pacific Leadership Forum ma le Mafutaga Soofaatasi a Faifeau, ae tainane foi le mamalu o Samoa potopoto.
O nei lava feiloaiga uma ina ia faailoa so latou lagona agai i le tulafono taufaaofi e pei ona nofo nei i totonu o le Palemene.
O lea ua mae’a taatia finagalo o pati a le Green faapea le ACT, ae o lea ua tālia nei ni feiloaiga o le a sosoo mai ai ma isi pati e pei o le National, le pati a o tatou uso Maoli, aemaise foi i le faai’uga o le masina fou o Aokuso, lea ua agiga ai se faaaliga mai le ta’ita’i o le pati a le NZ First, le afioga ia Vaovasamanaia Winston Peters, o lea o le a feiloai mai ai lana vaega faaupufai i le mamalu o Samoa e faailoa ai so latou taofi e tusa ai ma le mau.
Ma o nei feiloaiga e lē o nofonofo ai le tafatolu o le Mau o le Sitiseni i le sailia lea o ni seleni e faavagavaga e faatino ai fuafuaga o nei feiloaiga.
O le talitonuga o nei tamalii e tatau ona faatinoina auala ma vaega uma e tusa ai o taligamalo a Samoa.
O le Aso Toonai ua mavae atu na faataunuuina ai se taumafataga i le Otahuhu Rugby Club e saili ai se seleni auā le isi faamoemoe o le Mau o le Sitiseni o loo loma nei.
Na vaaia le sagisagi fiafia atu o le mamalu o le atunuu e lagolago lenei faamoemoe ma le manatu o Samoa o le vaa e fau tele auā le manuia o ona tagata.
O le afioga ia Leiataua Savea Al Harrington Lavea, sa fai ma Fofoga o le afiafi ae sa lagolagosua uma iai le Fono Faufautua, le Pacific Leadership Forum ma le Mafutaga Soofaatasi a Faifeau.
O le afioga ia Fepuleai Semi na saunoa e momoli le agaga o le faafetai i le paia o le aufaigaluega a le Atua sa autovaa atu faapea le mamalu o Samoa potopoto sa auai.
O loo iai le fuafuaga a le tafatolu o le Mau o le Sitiseni e faifai mālie lava sailiga seleni nei auā lava feiloaiga ma isi paiti o loo mulimuli mai.
