Ua iai nei se maliega ua faamautū i luma o le Faamasinoga Maualuga e faia ai se soalaupulega, i le va o le loia o loo tula’i e finau le tagi o se su mo se taui e $450,000 afe faasaga i ni tamaitai leoleo se to’atolu.
O ia malu o le malo o loo tuua’ia i lo latou loka sese o se tamaitai ona o le talitonuga o ia lea o OLP.
O le vaiaso nei ina ua toe amatalia galuega a le Faamasinoga Maualuga na valaau ai le tagi o le su a Katerinauatalia Talosaga Maria Toilolo Egelani Lesatele, faasaga i le Loia Sili a le malo o loo tuua’ia e avea ma sui o le Minisita o Leoleo, ma leoleo tamaitai e to’atolu o Berre Isopo, Saisirita Tufuga, ma Hanania Lene.
O le valaauga lea na faailoa ai i luma o le faamasinoga e loia a itu auai, ua iai se fetuuna’iga e ave le mataupu e soalaupule e sa’ili ai se maliega poo se settlement.
O lea soalaupulega i se maliega e taunuu iai o le a taulamua ai le Loia Sili a le Malo.
O vaega faapenei pe a oo iai se mataupu tau faamasinoga i se su, a lē talia e le itu o loo tagi se ofo tau tupe poo se isi lava taui mai itu o loo faasaga iai le su, e toe i’u se mataupu e su’esu’e e le faamasinoga ma aumai ai se i’uga.
