Ua maua e leoleo ma pueina se alii talavou e 15 tausaga a o faatino le latou suesuega i le maliu o se tina matua e 70 tausaga i le faaiuga o le vaiaso i le faaitu o Kuiniselani.
O loo talanoa le toatele o tagata i lenei faalavelave, na maliu ai si tina matua ina ua osofaia e lata ane i lana taavale i le kapaka a se taulaga faatau i Redbank Plains a o iai faatasi ma si ana granddaughter e na o le ono tausaga.
O le tina o Vyleen White na osofaia e ni talavou se toafā i le kapaka ma sosola ese ai ae maliu ai lava si tina lea.
O si ana grandaughter sa ia vaaia le faalavelave na tupu ae lei aafia ai ma o loo maua i meapueata a le CCTV alii ia e toafā na agai ese mai i le taavale a si tina matua lea ina ua mae’a ona faaoolima iai.
O lea la ua maua le toatasi ua molia i le faaaogāina faasolitulafono o se taavale ae o le isi toatolu o loo sailia pea e leoleo.
O le asō e tulai ai le 15 tausaga lea i luma o le faamasinoga o tamaiti i Ipswich.
