O le augani a le ta’ita’i o le Itu Agai i le faipule o Lotofaga e faamavae ma le tofi Palemia o le malo a o le’i oo ina faatino le lafo o le lē faatuatuaina pe a toe tauaofia le Palemene i le Aso Lua o lenei vaiaso, ua faaalia e le ta’ita’i o le malo i se pepa o faamatalaga, afai o silafia e le susuga Tuilaepa L Sailele Malielegaoi o ia te ia le numela e lagolago ai lana lafo ona faatali lea se’i faatino i totonu o le Palemene.
O ala ia o mea e tusa o faiga faavae ma aiaiga o le tulafono faavae.
Ua faailoa ai foi e le Palemia le afioga FIame Naomi Mataafa e le faamavae i se finagalo o Tuilaepa.
O le tasi o feiloa’iga a le ta’ita’i o le Itu Agai ma tusitala i le faai’uga o lena vaiaso na ia faailoa ai le taunuu atu o le tusi a le Fofoga Fetalai ua faailoa atu ai ua talia le faatinoina o le lafo o le lē faatuatuaina, ma o le galuega muamua lea a le Palemene.
Le susuga Tuilaepa Lupesoliai Sailele Malielegaoi, o le ta’ita’i o le Itu Agai i se feiloa’iga ma tusitala i le Aso Faraile na te’a nei.
I le faasalalauga mai le ta’ita’i o le malo ua faailoa ai e le tamaitai Palemia, e lē o le faaaogā e le ta’ita’i o le Itu Agai o auala o faasalalauga e faaleo ai lona mana’o e faamavae loa mai le tofi palemia pe afai o ia o se tagata e moni lona talitonuga i faiga faatemokarasi ma le faavae o Samoa.
Faaalia e le afioga Fiame Naomi Mataafa, o ia na filifilia e ta’ita’i le malo, ma e lē see ese ma le tofi ona o se mana’oga o Tuilaepa.
O loo iai i le Faavae ma Tulafono Tumau o le Palemene le ala e mulimulita’i i ai mo se palota o le lē faatuatuaina.
Afai e mautinoa e Tuilaepa o lo’o iai i lana Vaega le fuainumera e mafai ai ona suia le Palemia, ia tuu pea la i le finagalo o le Palemene.
Afai e leai, e lē tatau la ona faamaʻumauina fua le taimi i ana faalavelave o loo faagasolo nei.
O se fautuaga mai le Palemia i le susuga Tuilaepa, soia le taufaasese i le atunuu ma ana finauga, ae ave i le Palemene o le nofoaga talafeagai lena.
I le feiloa’iga a tusitala ma le susuga Laauli Leuatea Polataivao Fosi Schmidt ua avea nei ma ta’ita’i o le vaega faaupufai o le Faatuatua i le Atua Samoa ua Tasi, sa ia faailoa ai o loo iai le latou tapenaga i le gaioiga o le a latou faatino i le taimi e talanoaina ai le lafo o le lē faatuatuaina, peitai e faato’ā iloa poo le ā lea tapenaga pe a tauaofia le fono usu a Samoa i le Aso Lua, 25 o Fepuari.
