E tulaga ese foi faamatalaga ua faailoa nei i se faalavelave na tupu i Sini i le aoauli o le Aso Sa lea o loo sailia ai nei e leoleo ni alii se toatolu, fai mai pe ā ma le ta’i 20 tausaga le matutua.
Lipotia e le 9News na maua atu se isi alii 20 tausaga o loo faamanu’alia mai se fana i Carlisle Ave i Bidwill ma ave atu ai loa i le falemai i Westmead.
O molimau na o latou faamatala o talavou e toatolu e pei ona ta’ua sa o latou tafanaina le talavou lea.
Fai mai o nisi o pulufana mai le faalavelave lea sa maua i le auala savali i tua ane tonu o le Bidwill Square o loo taaalo ai ni tamaiti.
E talitonuina o lē na aafia na momo’e agai i le fale o se tasi o ana uo e lata ane ma valaau ai mo se fesoasoani.
O loo faagasolo pea le suesuega.
