A o tuli ai nei le faasalaga ono masina i le falepuipui i Tanumalala o le tagatanuu o Saina le alii o Qinping Yan, ina ua faamaonia lona taumafai e aveese atu ma Samoa se uta o figota o le sami mai o tatou gataifale i le faamoemoe e faatau, o lea ua maua le faai’uga tusitusia a le afioga i le faamasino o le Faamasinoga Faaitumalo le afioga Mata’utia Leota Raymond Schuster, o loo faailoa ai nisi o vaega tāua mo le silafia e le atunuu.
Ua faailoa i le faai’uga tusitusia o lē ua nofosala nei i le falepuipui sa avea ma pule poo se manager i le kamupani i Samoa e ta’ua o le Best Value, ma o lea pisinisi o loo faagaioia e nisi o tagata mai Asia.
Ua faailoa ai foi ma igoa o figota sa taumafai lea tagata e ave e faatau i maketi i Asia, e aofia ai o susuvalu uliuli, fugafuga, loli aau, maisu, faatafa, mama’o ma ulutunu.
O le tau atoa o lea uta o figota e pei ona faailoa atu e $820,000 afe tala Samoa.
O le tau aofai lea na fua iai le faasalaga tupe e 130 afe tala e totogi e lē ua molia ma e vaelua i le matagaluega o faatoaga ma faigafaiva ma le matagaluega o tiute ma tupe maua.
E lē mafai ona tipoti ese ma Samoa Qinpin pe a mae’a tuli le ono masina o lona faasalaga ae lei mae’a ona totogi le sala tupe.
E toe tulai i le faamasinoga mo se isi aiaiga i le faasalaga, ae afai e uma le ono masina ua uma foi ona totogi le 130 afe tala, ona tipoti ese lea ma Samoa e ala i le sainia e le minisita o mataupu tau femalagaa’iga o se poloaiga e aveesea ai ma Samoa.
E lima tausaga e lē mafai ona toe ulufale mai ai i lo tatou atunuu lea tagatanuu o Saina e faamautu i le nofoaga e ta’ua o Fujian Province.
