E 14 lālā o le faletupe o le Bank of Queensland o le a tapunia i totonu o Ausetalia ma o se faai’uga ua lē fiafia tele iai sui o le iuni o tagata faigaluega.

O ia lālā e aofia ai le 1 mai Western Australia poo WA, 3 i Niu Sa Uelese, 4 i Vitoria ma le 6 i Kuiniselani.

O le a amata tapunia mai le aso 19 o Fepuari aga’i i le aso 27 o le tausaga nei lava.

Ua ta’ua i le 9News ua faia e le faletupe lea faai’uga faigata a o taumafai ai e faafaigofie lana auaunaga ma ua to’atele foi ana paaga e faaaogā upega tafa’ilagi ma faiga fou faaonaponei.

Na ta’ua e sa latou sooupu, o loo ua taula’i nei lana auaunaga i le lagolago atu i tagata faigaluega a o faatino ai nei suiga ma le faamoemoe e faatumau pea auaunaga aupito lelei mo ana paaga.

Peitai ua faailoa le lē fiafia iai o le Finance Sector Union ma faailoa ai so latou finagalo o lea faai’uga o se gaioiga lē manuia, fai mai a latou e faalagolago tagata Ausetalia i o latou faletupe faalotoifale ma o le aveesea o lālā ia mai pitonuu o se gaioiga faamāina ma faalata i tagata.

Ua valaau ai le Iuni i le faigamalo o iai nei a Ausetalia ina ia fesoasoani ane i le mataupu lea ma faia ni tulafono e puipuia ai teugatpe a tagata aemaise i faaitu e aafia.

Puna o Faamatalaga: https://www.9news.com.au/national/bank-of-queensland-to-shut-14-more-branches-across-australia/1e0a5c08-9037-4c13-8460-8d626231de36