O se loli la’u suāuu na pa i le vaiaso nei i le itu i Matu o Nigeria ua faailoa mai ua oo atu i le 153 tagata ua maliliu ai, o i latou na lolofi atu i le nofoaga o le faalavelave e aoina penisini na liki ane mai lea loli telē.
Na faaleagaina le taavale i le afi ma ua faamauina pe ā ma le to’a 100 na manunu’a ai ma ave atu foi i le falema’i mo togafitiga, to’atele e tigaina.
Fai mai le faamatalaga sa lapata’ia e leoleo tagata i le faaitu na tupu ai le faalavelave ina ia faamamao ese peitai e le’i mafaia ona o latou taofiofia le to’atele na lolofi ane mo le fia maua o ni penisini mai le loli na aafia lea la ua iu ina maliliu ai.
O le loli na aga’i ane mai le faaitu e igoa o Kano aga’i i Nguru ae tupu ai le faalavelave ina ua lē mafai ona taofiofi e le aveloli le taavale ma lavea ai i le taulaga o Majia.
E lei aafia le avetaavale ma o loo faia iai su’esu’ega, ae o i latou e to’atele ua maliliu e lei aafia i le lavea o le loli peitai na aafia i le afi na sasao ane a o lolofi atu e fia maua ni penisini mai le loli na faaletonu.
Puna o Faamatalaga: https://www.bbc.com/news/articles/c4gl5zye65ro
