O lea ua amata aloa’ia nei tiute o le Tausala o Samoa na manumalo i le tauvaga na saili ai se tausala o le atunuu i le faai’uga o le vaiaso ua mavae.
Sa faatumulia le maota Samoa o le pulega o tagata tafafao mai fafo i le Aso Lua o lenei vaiaso i aiga ma uo ma le aulagolago a le Tausala o Samoa le afioga Tooa Litara Ieremia-Allan, i le sauniga na momoli aloa’ia atu ai i le pulega o tagata tafafao o le a galue ma faatino ai ona tiute faatausala o le atunuu.
O lea foi auaunaga tuma’oti a le malo o le a gafa ma tapenaga mo lona sauni ai i le tauvaga e saili ai se tausala o le Pasefika e faia i le atunuu o Solomona.
O le ta’ita’ifono o le Komiti Faafoe o le pulega o tagata tafafao, o le tamaitai Pule Sili o lea pulega ma le aufaigaluega sa latou molimauina lea vaega tāua, o le laasaga amata o le nofoaiga e 12 masina a le afioga Tooa Litara i le tauaveina o le tofiga Tausala o Samoa.
