O le fesilafaiga a le Onomea Production ma le Digicel Samoa faapea ai ma le Pulega o Tagata Tafafao Maimoa mai Fafo i le taeao nei e molimoli ai le Tausala o Samoa ua faapaleina nei le tamaitai ia Moemoana Safaato’a Schwenke.
O le momoliina aloaia o le tausala Samoa e amatalia ai ona tiute ma ona tofiga e ala lea i auaunaga a le Pulega o Tagata Tafafao Maimoa mai Fafo e tatau ona auai ai le Tausala ae le gata i lea o ana tapenaga mo le sailiga tausala o le Pasefika i le tausaga fou.
Saunoa le sui o le Onomea Production, Leituala Kuiniselani Toelupe Tago e tusa ai o le faamoemoe o le aso.
“O le taeao lenei o le a molimoli atu ai le tausala o Samoa ma ona laei e aofia ai lona tuiga ma ona poutu, o lona pale fuiono, o lona lauao ma saisauo’o o vaega uma ia o ona laei ina ia onomea ma ia mataina auā ua atoa ai le mamalu o le tamaitai Samoa.
“O le agaga maualuga ia momoli aloaia atu le tatou Tausala ma o le tatou galuega fai faatasi e tapue ma aputiputi ina ia mautinoa lona saogalemu.
“Ae lē gata i lea ia atoatoa le mautinoa o le aputiputiina o lenei tofiga ua tauave e le Tausala nei.
“O lona uiga o so matou vaivaiga ia ogatasi le futia ma le umele ia tatou faamoemoega ma fuafuaga e amanaia ai le mamalu o lenei tofiga e aunoa ma ni tulaga e luafesasi ai le silasila a le tatou atunuu ma le fetosoa’ina ai faapa’utolo a loi le tofa i galuega fai a le tatou Tausala.”
E pei ona iai le manulauti o lenei tausaga i le sailiga o se tausala a le atunuu ua onomea ma ua atoa ai le mamalu o le tamaitai Samoa.
“O mamalu tauave ia e faavae i luga o le alofa, o le fetausia’i ma le feavata’i auā o le tiute a tatou uma ina ia tau lau o le faamoemoe.”
Na faaleoina ai foi le faafetai i paaga uma na fesoasoani i lenei faamoemoe aemaise le kamupani telefoni a le Digicel sa lagolagoina malosi lenei tauvaga.
Na faaalia le finagalo o le Tausala ia Moemoana Safaato’a Schwenke o lenei tofiga ua ia pale mai ai o se faaaloalo tele lea a le atunuu mo ia.
“I le tulai mai ai o lenei tofiga o lea taumafai i le mafai e auauna ma tautua le atunuu i vaega e ao ina ou faatino aemaise i le aganuu.
“E 26 tausaga talu ai sa faapaleina ai si o’u tina i lenei foi tofiga ma sa ia faaaogāina lenei avanoa e faasoa ai lana lagolago i vaega o le siosiomaga e ala i le faasaoina o le manumea e pei ona iai lana taleni ua silafia e le toatele.
“E faapena foi se lagona ia te au, o ā polokalame ma vaega e ao ina ave iai le fesoasoani ma le tautua o le a faatino lava mo lou atunuu.”
O loo tapena foi le Tausala e ala lea i le faamoemoe o le sailiga o le tausala o le Pasefika i le tausaga fou.
