Ua mapu atu i lona tuugamau le afioga Faumuina Faaolatane Tiatia Liuga ina ua mae’a ona toe sauniga faalemalo sa faagasolo i le Aso Gafua o lenei vaiaso i Samoa, lea sa auai le afioga i le Ao o le Malo, o ta’ita’i o le malo ma le atunuu o ona aiga, faapea paolo ma uo mamae.

O se tamalii sa molimauina e le Sui Palemia ma le ta’ita’i o le Itu Agai le telē o lona sao i le atina’e o Samoa, a o ia umia le tofi faipule o le itumalo o Palauli le Falefa mo paea’iga sosoo e fā a le Palemene mai le paea’iga 13 e oo i le paea’iga 16 a le Palemene mai le tausaga e 2001 e oo i le tausaga e 2021.

Na molimau le Sui Palemia le afioga Tuala Tevaga Iosefo Ponifasio ma ia faailoa o Faumuina o se tagata e toa e saunoa i totonu o le Palemene ma matagaluega sa galue ai i le tofi Minisita o le Kapeneta, lea sa mua’i avea ma Minisita o Galuega Tetele, sosoo ai le Matāgaluega o Puna’oa Faalenatura ma Si’osi’omaga sa avea ai ma ta’ita’ifono o le Komiti sa tapenaina le taligamalo a Samoa i taaloga a le Pasefika i le tausaga e 2007.

Sa avea ma Minisita o Tupe, sosoo ai ma le tofiga Minisita lagolago o le matagaluega o Puna’oa Faalenatura ma Si’osi’omaga i le paeaiga lona 16 a le Palemene na muta ai lona tofi faipule ina ua lē manuia i le palota tele o le tausaga e 2021.

O le ta’ita’i o le Itu Agai susuga Tuilaepa Lupesoliai Sailele Malielegaoi sa molimau foi i le tele o galuega lelei sa faia e lea tamalii, auā sa ia molimauina lea tulaga a o avea ma Palemia ma avea ai Faumuina Faaolatane Tiatia Liuga ma se tasi o minisita o lana Kapeneta.

O ona toe sauniga sa faia i lana Ekalesia Nasareta i Ululoloa ma faai’u ai i ona toe sauniga sa tauaao ai e le Sui Palemia le fu’a poo le tagavai o le malo tuto’atasi o Samoa i alo o le afioga Faumauina, o se faaaloalo maualuga faalemalo e avea ma pine faamau o le soifua tautua o lea ta’ita’i i lo tatou malo ma le atunuu.