Ua faailoa mai e faauluuluga o le WHO toeitiiti lava 90 pasene ua pa’ū ai le aofai o tagata ua maliliu ona o le Koviti-19 pe a faatusa atu i le 9 masina talu ai ma o se tulaga faalototele lea ae o loo unaia pea tagata ina ia mataala pea i le faamai ona o loo iai foi isi variants fou o loo aliae pea.
O le faatonu aoao o Tedos Adhanom ua ta’ua o le vaiaso na tea nei e silia ma le 9,400 tagata na maliliu e iai sootaga i le koronavairusi, i le masina o Fepuari o le tausaga nei o le aofai o tagata e maliliu i le vaiaso e iai sootaga i le koviti e silia ma le 75 afe i le lalolagi atoa.
Fai mai le faatonu o le toeitiiti 10 afe o tagata maliliu i le vaiaso o le 10 afe lea o se aofaiga toatele o tagata e ma’umau soifua i se faamai e mafai ona togafitia ma alofia.
I lona tuuaofaiga e oo mai i le taimi nei ua faaalia e le WHO e 629 miliona tagata i le lalolagi ua aafia i le faamai ma le 6.5 o tagata ua maliliu e iai sootaga i le faamai.
