O lea ua tuuina atu le isi talosaga a le Ofisa o le Loia Sili e ala i le mataupu fou i luma o le faamasinoga e fai ai sana poloaiga e taofia le iloiloina o le mataupu ma le suesueina o le mataupu i le nofoa faaopoopo a tamaitai i le Palemene e pei ona tuuina atu e le FAST i luma o le faamasinoga.
O le finau a le Oisa o le Loia Sili e faaleaogaina lenei tagi aua ua maea ona malele le Ao Mamalu o le Malo i le po anapo e faaleaogaina uma ai faigapalota a Samoa na faia i le masina o Aperila ae toe fai le isi faiga palota i le aso 21 o Me 2021.
E pei ona silafia o le asō lea na tālia ai e le atunuu se faaiuga a le faamasinoga faatatau i le mataupu autu o le nofoa faaopopo o Tamaitai i le Palemene peitai lea ua faataatia lea mataupu ae suesue muamua le mataupu fou lea na tuu atu e le Ofisa o le Loia Sili i le taeao nei.
Taua i ripoti afai ae talia e le faamaisnoga le talosaga i le mataupu fou e faaleaogaina le tagi a le FAST, ona muta ai lea o lea mataupu, ae afai e lē talia e le faamasinoga lenei talosaga fou ona faaauau pea lea o le suesueina o le mataupu i le nofoa faaopoopo.
O le aso Faraile 7 o Me lea ua atofa e tuuina atu ai finauga a Loia i le talosaga lea ua tuu atu e le Loia Sili ona sueusue lea o lea mataupu fou.
O lenei mataupu na faalia ai le faanoanoa tele o le Sui Taitai o le FAST afioga Laauliolemalietoa Polataivao Schmidt i luga o upega tafailagi ma ia taua “e tumau pea le FAST i le tulafono ma e lē nofonofo le FAST o le a finau pea mo le amiotonu, ma e leai se pule e i luga atu o le tulafono”.
Taua foi e Laauli, “o lea ua tapena le FAST e tuu atu ai le isi talosaga i luma o le faamasinoga e faaleaogaina ai le malelega a le Ao o le Malo ina ia toe fai le faiga palota a Samoa”
Ripotia mai e Tusitala Samoa, le faanoanoa o le faamasinoga i le Ofisa o le Loia Sili i le lē amanaia o aiaiga e mulimulitai ai faatonuga a le faamasinoga e ala lea i le faatalalē i le tuuina atu o a latou faamaumauga faatatau i le mataupu autu i le Aso Gafua na tea nei. Taua e le afioga faamasino ia Niava Mata Tuatagaloa e lē talafegai i le Loia Sili lea tulaga ma e tatau ona ia ausia tulaga masani o le faamasinoga.
