Ua faamaonia e le alii loia o loo tulai mo Fauena Su’a poo Sam faapea Sivai Mamea Kepi ua iai se faaseā a leoleo e faasaga ia te ia o loo masalomia ai sa ia faalafia lea ulugalii a o tau saili ai e leoleo.
O lea itu na faamalamalama atili mai e le alii loia o Lagaaia Fetu Lagaaia i le autusitala ina ua ia faailoa i le faamasinoga e iai ni faamatalaga fou ua ia mauaina i suesuega a leoleo.
O le Aso Faraile na tea nei na faatulaga e le faamasinoga e iloilo ai le talosaga a Sam ma lona toalua e faasee ese le tamaitai faamasino o Talasa Atoa Saaga mai le seei i le suesuega o le la mataupu.
Peitai na tulai le loia a Sam ma Sivai ma talosaga i le faamasinoga e toe tolopo le mataupu mo le isi lua vaiaso, talu ai ua iai ni faamatalaga fou, ua oo atu ia te ia e faatatau i lea mataupu.
Faaalia e Lagaaia o lana maitau i le tulaga ua oo iai le mataupu, ua ese le itu ua agai i ai suesuega a leoleo, e pei e foliga mai o le a tuu le mataupu ma moliaga ae o le a faasaga i le tagata.
Faaalia e Lagaaia na fesootai atu leoleo ia te ia i le aso na latou mauaina ai Sam ma fesiligia ia poo i lona ofisa Sam ma Sivai ma sa ia tali sa’o lava i leoleo o loo i lona ofisa.
Ta’ua e le alii loia o le aiātatau a le tagata o loo molia o le tāpā o le fesoasoani a se loia e finauina lana mataupu.
Aemaise e iai puipuiga i le va o lē o loo molia ma lana loia poo le confidentiality ma o i o loo tuufesili ai lona mafaufau poo fea e faamuta ai le faatinoga o galuega a leoleo ma le galuega a le loia ona o loo faapea atu leoleo e tatau ona ia tuu atu uma faamatalaga e faatatau ia Sam i le matagaluega.
O le talitonuga o le alii loia, afai o le tulaga lea ua oo iai le mataupu, o lona uiga ua sosofa e le matagaluega o leoleo le va o le tagata o loo molia ma lana loia.
Faailoa e Lagaaia ua mae’a faailoa i le faamasinoga lona faasee ese se’i tapena muamua tuua’iga ua faamalumalu atu ia te ia, ina ia aua ne’i ta’uleagaina ai lona igoa aemaise o lona ofisa.
E lē o se itu e atugalu ai le alii loia pe a faasee tuagalu, ona o loo taoto fuafuaga a le alii o Sam ma lona toalua, aemaise i le itu tau seleni.
Na talia e le tamaitai faamasino le talosaga a le alii loia ma ua tolopo le mataupu i le aso 12 o Aperila, ma e tatau ona oo atu i le aso lea ua tulai se loia mai fafo e finauina le talosaga a Sam ma lona toalua o Sivai.
E lei faia ni moliaga e faasaga i le alii loia peitai ua ia ta’ua afai ae iai ni moliaga e faia e faasaga ia te ia ua ia tapena foi e finauina i luma o le faamasinoga.
