E lē o muta le faaauau pea o le tuu atu o le tau’au fesoasoani a le Malo o Iapani mo Samoa i le itu tau aoaoga talu mai le tausaga e 1991.
Ua amata fiafia le masina o Iulai mo le fanau aoga a le aoga tulagalua a le afioaga o Fusi Safata ina ua aloa’ia i le asō le mae’a o galuega toe faaleleia mo le latou faleaoga.
O lenei atina’e na faatupe e le malo o Iapani i lalo o le polokalame fesoasoani ua faaigoaina ‘Grant Assistance for Grass-Roots Human Security Projects (GGP) ma e silia ma le $200,000 tala na faaaogā e toe faafou ai potu aoga e 9, o le ofisa mo le aoga, potu tusi ma le fausiaina o se poloketi e faaaogā e fanau mo le suavai mamā.
Na molimauina lea faamoemoe e lana afioga le Amepasa o Iapani i Samoa Mr Senta Keisuke, o le afioga i le Minisita o Aoga Taaloga ma Aganuu, Seuula Ioane faapea sui faipule o le Itumalo Safata ma le to’atele o le afioaga faapea fanau aoga.
