E lima selau avanoa faigaluega mo nisi mai Samoa e galulue ile kamupani tuuapa i’a o le Starkist i Amerika Samoa. O se manaoga lea ua faaoo mai ile Malo o Samoa ina ua maea feiloaiga a sui o le pulega o lea kamupani tele ma le Minisita o le Matagaluega o Pisinisi Alamanuia ma Leipa ile vaiaso nei.

Ua faaalia e le Minisita le tofa Leatinuu Wayne Sooialo ile polokalame o le Soalepule, o le a faatalanoa atili lea manaoga ile fono o le atoa o Samoa ile masina fou o Oketopa, ae i sona lava lagona e iai ona atugaluga ile faatupulaia ai pea o tagata tino malolosi ma le au talavou e tuua le atunuu, ae faaletonu ai le fatuaiga tausi aemaise o atugaluga o le faalapotopotoga o le au faipisinisi ile faaitiitia ai ma tagata faigaluega mo a latou atiina a’e tau pisinisi.

Faaalia foi e le Minisita le tofa Leatinuu Wayne Sooialo o le tasi o itu ua silasila iai e avea o se fofo i le faafitauli o le malaga ese oo tatou tagata mo ia galuega i Tutuila, o le faatu ose isi vaega o le starkist i Samoa e faafigaluega ai o tatou tagata.

O  se isi lea faiga e mafai ai ona taofiofi pea o tatou tagata e aunoa ma le o ese atu mo se taimi umi, aemaise o galuega i lea kamupani e tuu saunoa e le pei o galuega faavaitaimi e maea loa masina ma tausaga faatulagaina e galue ai, ona toe foi mai lea i Samoa. Ua faailoa foi e le Minisita e faapea,  o le lipoti a se komiti na ave iai le toe faia ose isi iloiloga i aiaiga o galuega faavaitaimi i Niusila ma Ausetalia, ua le talia ona e leo ogatasi ma le finagalo o le kapeneta.