O se tamā mai Sini e to’alua si ana fanau ua lipotia o loo taumafai nei e fetuuna’i se faiga o le pili e $25 afe o le totogi faaletulafono ina ua aafia i se mataupu ua tuua’ia ai i le taufaaleaga ae mafua mai i se faamatalaga sa faia i luga o le facebook ae lē o ia na faia.
Fai mai le 9News o le tamā lea o Andy Leonard 45 tausaga sa avea o se tasi o administrator o se kulupu i luga o le facebook e aofia ai mātua, ae ua ave i le tulafono ona o se faamatalaga na te lei tusia i le 2023.
O le faamatalaga e lē logolelei mo lē na aga’i iai le faamatalaga ma na silasila iai nisi o lea kulupu, ae faate’ia le tamā lea ina ua tusi atu se loia e ave i lalo ia faamatalaga ma tusi atu sana faatoesega.
Mulimuli ane toe logoina le tamā lea ua ave o ia i le faamasinoga ona o le taufaaleaga ma e tatau ona ia totogi atu le tau faaletulafono o le mataupu lea e $15 afe ma le $50 afe aga’i i le tagata na aafia.
Ua oo i le silia ma le $25 afe le tau e totogi e le tamā lea mo le mataupu lenei i le faamasinoga ma ua saili fesoasoani ai i se Gofund me page e fesoasoani e totogi nisi o pili o lea mataupu ae lē o ia na faia le faamatalaga.
O lana faamatalaga i le 9News ua ia faamatala le tulaga ua oo ia te ia ia silafia ai e le to’atele e ao ona faaeteete aemaise pe afai e avea oe ma administrator i kulupu i luga o le facebook.
Puna o Faamatalaga: https://www.9news.com.au/national/dad-slugged-with-25k-defamation-bill-over-facebook-post-he-didnt-write/745c12c0-51eb-48ce-9f3a-c240142b8f8e
