Ua silia nei ma le vaiaso talu ona sola ese ma le falepuipui i Tanumalala le pagota o Lauititi Tualima ma e le’i maua lava, ae o loo faaauau pea sa’iliga a leoleo.
O lea ua faailoa e le Komesina o leoleo, falepuipui ma le toe fuata’ina ua iai faamatalaga ua oo atu ua ta’ua ai e ni molimau, ua oo atu Lauititi i Faleatiu ma Satapuala ma ua aga’i foi le vaega o leoleo o loo feagai ma sa’iliga.
Ae ua toe talosaga le Komesina i le fesoasoani a le atunuu aemaise afio’aga ua laumanu’ia le oo iai o lea pagota sola, ina ia fesoasoani ane i le galuega a malu o le malo.
O le Aso Lulu na te’a nei na sola ese ai Lauititi Tualima ma le falepuipui i Tanumalala, ma e lē o le taimi muamua lea ua sola ese ai.
Sa ia solia lea tulafono o le falepuipui mo le ‘au nofosala a o tuli lona faasalaga i Tafaigata le nofoaga tuai sa iai le falepuipui.
O lana sola’aga muamua lea mai Tanumalala.
