Na faatau ese e le Malo i le tausaga e 2011 ona sea i le kamupani o fesootaiga a le atunuu le SamoaTel i le kamupani Amerika o le Blue Sky i le tau e 20 miliona tala.
Mai lena taimi e oo mai i le tausaga nei ua 11 tausaga talu ai, o lea ua see atu le faigamalo fou ua iai nei ma lana fuafuaga e toe faatau mai le kamupani o loo pulea le uaea o fesootaiga i lalo o le sami le Samoa Submarine Cable company ma toe faatau mai ai ma sea poo shares o loo umia e kamupani telefoni feaveai o le Digicel ma le Vodafone i le pulea ma le faagaioia o le kamupani.
O nisi o itutino o le Malo o loo faisea iai o le faalapotopotoga inisiua a le atunuu, o le UTOS, le NPF, le Computer Service Limited ma pisinisi o le Vodafone ma le Digicel. O le lomiga a le nusipepa o le Samoa Observer o le Aso Toonai o loo faailoa ai e le Minisita o Fesootaiga le afioga Toelupe Poumulinuku Onesemo, na faatau atu e le Malo lea laina o fesootaiga i lalo o le sami i le 20 miliona tala, ae o lea ua lele ane i le vateatea le tau i le taimi nei e selau miliona tala.
O le Samoa Submarine Cable o se kamupani e tāua i le silasila a le faigamalo ua iai nei ona e tatau ona umia e le Malo ma faapena ona tauofo mai iai pisinisi tau fesootaiga mo le faaaogāina. Peitai o lea umia e le aufaipisinisi tau fesootaiga ma ua faafaigata ai ona faatino le polokalame o le maua o fesootaiga initaneti mo aoga uma i le atunuu, ona ua tauva nei lea kamupani o loo pulea le laina o fesootaiga ma le isi kamupani o loo umia e le Malo, le Samoa National Broadband Highway lea e maua ai fesootaiga e aoga mo le faaaogāina e fanau. Faaalia e le Minisita i lea lipoti e lē o lelei le fesootaiga lea ae o loo totogi e le Malo.
Ua ave nei se faatonuga a le kapeneta i le Matagaluega o faamatalaga faatekonolosi ma fesootaiga e tapena atu se fuafuaga mo le toe faatauina mai o le kamupani o le Samoa Submarine Cable.
