O le masini e saili ai le faamaoniga o ni fualaau ma ni pauta faasāina ua masalomia ua faaulufale mai i lo tatou atunuu i se auala solitulafono, o se tasi lea o meafaigaluega tāua ua aofia i le foa’i a le Malo o Ausetalia ua tuuina atu i le matagaluega o le tiute ma tupe maua.

O se masini e lē fesiligia le mana’omia mo galuega o leoleoina o o tatou tuaoi e pei ona feagai ma le aufaigaluega a le ofisa o le tiute.

O nisi o meafaigaluega mai lea foa’i o masini fā’ata poo cabinet xrays e tāua tele mo le galuega ma auaunaga a le ofisa o le tiute.

O le Komesina Maualuga o Ausetalia i Samoa na fai ma sui o lona malo, e tauaao i le Sui Palemia o le Minisita o le Matagaluega o Tiute ma Tupe Maua le afioga Tuala Tevaga Iosefo Ponifasio ia masini ma meafaigaluega, e faatino ai le tautua a alii ma tamaitai o le ofisa o le tiute.

O Ausetalia o se tasi o malo o loo tuu mai pea lona tau’au e lagolago i soo se galuega o le atina’e o le tatou atunuu, aemaise o le itu i le puipuiga ma le leoleoina o o tatou tuaoi mai gaioiga solitulafono.

O le tuuina atu o le fesoasoani a le malo o Ausetalia ua sainia ai foi ma se feagaiga poo se memorandum of understanding i le va o le Australia Border Force na auala mai ai le foa’i ma le Matagaluega o Tiute ma Tupe Maua.