Ua fetaui lelei le aso mālōlō i le asō i Sini ma fuafuaga a le to’atele o le autapua’i a le Panthers mai le po anapo auā se mālōlōga lelei poo ni tafaoga foi e faamanatu ai le malo o le latou ‘au i le sailiga siamupini o le NRL poo le taamilosaga liki i lenei tausaga 2024.
O le po anapo na faataunuu ai le fetauiga i le va o le Penrith Panthers ma le Melbourne Storm.
O se taaloga mata’ina na faai’u i ‘ai e 14-6 manumalo ai le Panthers mo le fā ai lea o tausaga sosoo o avea pea ma siamupini.
E lē faigofie ona ausia lea tulaga e se ‘au ma o le fiafiaga lea o le to’atele o le autapua’i.
Ua faaauau ai ma faamanatuga o le malo mai le po anapo aemaise i latou mai le faaitu a le Panthers.
O le tausinioga i le va o le ‘au a tamaitai a le Roosters ma le Sharks sa sailia le siamupini na malo ai le Roosters i ‘ai e 32-28 ma siamu ai le Roosters mo le 2024 i le taamilosaga a tamaitai.
