O le vaiaso nei na faailoa mai ai e le Matagaluega o le Soifua Maloloina e ala i se faasilasilaga le fautuaina ai o le atunuu i lenei vaitaimi o le pepesi o le fūlū masani (common flu).
O lenei faaaliga na faailoa mai ai foi ma auala e mafai e tagatanuu ona faia e puipuia mai ai i le ono aafia i lea faama’i.
E pei ona silafia o le fūlū o se tasi lea o faama’i e vave tele lona pipisi ma e tatau ona nofouta iai. Talu mai le masina o Iuni o le tausaga nei ua matauina e le Matagaluega le siisii i luga o le numera o tagata ua vaaia ai āuga o le fūlū masani pe a faatusatusa atu i tausaga e lua ua tuanai.
Ua fautuaina ai le atunuu e tautuana ina ia faamamā totonu o fale ma nofoaga ma pupuni fofoga pe a tale pe mafatua foi i se solopepa mamā ona tia’i lea i le lapisi.
