Ua ave se tuualalo a le Taitai o le Itu agai le susuga Tuilaepa L Sailele Malielegaoi i le Faigamalo ina ia amanaia ma faatāua aiātatau a tagata faigaluega.

O le tuualalo e pei ona faailoa i se pepa o faamatalaga mai le vaega faaupufai e puipuia aiātatau o tagata o loo iai ni lipoti ua ta’ua ai se gaioiga a le Komisi o Galuega a le Malo na latou aveesea mai ai se faamaumauga faatekonolosi o le masini computer a le Faatonu Sili o le Soifua Maloloina mo suesuega i le mafuaaga o le tuai faatino o le galuega o le masini fā’ata, le CT Scan mo le auaunaga a le soifua maloloina.

O le aveesea o faamaumauga o faamatalaga uma o le masini computer a le Faatonu Sili poo le computer hard drive, a’o toesea le faauluuluga i se siaki faafoma’i i Niu Sila ua faaalia e le taitai o le Itu agai o se gaioiga ua faia faasolitulafono, e aunoa ma se faatagana na tapa mai le faamasinoga. O le amanaia ma faatāua o le aiātatau o tagata faigaluega a le Malo o se vaega tāua o pulega lelei e pei ona faaalia e Tuilaepa i le pepa o faamatalaga.

Ua lipotia e nisi o auala o fesootaiga televavave le ave ai o aso malolo poo livi o le Faatonu Sili, a’o faagasolo le suesuega a le Komisi o galuega a le Malo i le mataupu i le masini fā’ata le CT Scan, lea ua mae’a faailoa e le Minisita o le matagaluega ua taunuu ae oo mai i le taimi nei e lē o iloa pe ua faapipii ma faaaogā. O gasegase e manaomia lea masini o loo malaga i Amerika Samoa e fai ai o latou fā’ata.