O le tamaitai tusitala ma solo fatu o se faiaoga foi o ia lea o Professor Caroline Sinavaiana Gabbard o se tagata talitonu o le tapuaiga Buhdah, ma o ona toe sauniga i le malumalu o le fale maliu o Pa’u Sefo Pa’u i Tafaigata sa faatino e tusa o talitonuga o lana lotu.
O le faia o ia sauniga mulimuli o le tina na maliu i se gaioiga solitulafono i le aso 24 o le masina ma te’a nei o Me, na faaiu i le faaliu lefulefu o lona tino ma tapena ai mo le auina atu i lona aiga i Amerika.
O ona tauaiga i Samoa sa auai faapea i latou e lagolagoina le tomai a’oa’oina o le tina.
O le saofia o sauniga faaiu ma tapena ai mo le auina atu i lona aiga, na mafai ona faataunuu i le Aso Tofi o lenei vaiaso ina ua mae’a le taotoga faapitoa e sailia ai le mafuaaga o lona maliu, e pei ona faatonuina e le pule o maliu.
O le Aso Gafua o le vaiaso asau e toe tulai ai i le faamasinoga maualuga lē o loo tuua’ia i le maliu o Caroline le tamaitai tusitala ma solo fatu o Papalii Sia Figiel, lea e lei tuuina atu sana tali i moliaga ua faamautu a leoleo.
Ua lē manao lē ua molia i se loia, ma o le a iloilo lea tulaga pe a toe valaau lenei faamasinoga i le vaiaso o muamua.
