Ua faailoa le fesoasoani a le Malo o Niu Sila o le a toe fausia ai le maketi i Savalalo, ae o lea foi ua faailoa se fesoasoani a Niu Sila o le a faatupe ai se masini fā’ata faaonaponei poo se Xray scanner mo le malaevaalele faavaomalo i Faleolo.
Ua faailoa lea fuafuaga e le Minisita o Pulega o Malae Vaalele le tofa Olo Afoa Fiti Vaai, ma le fuafuaga o le a tāua tele lea masini fā’ata mo le siakiina o ato ma uta e taunuu i le malaevaalele faavaomalo autū, mo le sailia ai o gaioiga faasolitulafono i le faaulufale mai o pauta ma fualaau faasāina i lo tatou atunuu.
O se masini ua faamatalaina o le a taofia ai ia gaioiga o loo faia e nisi o tagata e fai malaga mai i Samoa. E pei ona silafia o se tasi o taumafaiga e saili ma su’esu’e lelei oloa o loo aumaia i le atunuu pe lē o aumai ai pauta ma fualaau faasāina faapea aupega malolosi, o le masini fā’ata foi mo le uafu tele i Apia, auā o nofoaga ia o loo mata’itu lelei ia taofia le sao mai ai o ia vaega e tapu ma faasā i Samoa.
O se tasi o galuega mo le siitia pea o puipuigamalu i lo tatou malaevaalele faavaomalo i Faleolo, o se masini ua amata faaaogā nei ua maua ai le pepa ID e faaaogā e se tagata e ulufale ai i nofoaga o le malaevaalele, ae faatapulaa le aogā ma o le taimi lava e mae’a ai, e faapena ona uma le aogā ma le mafai loa e se tagata ona toe iai i le nofoaga sa maua iai le faatagana, ma ua tatau loa ona tuua ma alu ese.
