O se ulua’i faata’ita’iga i le lalolagi atoa o le a faia i Kuiniselani o loo faamoemoe o le a maua ai se fesoasoani mo tagata mo se fuālaau o le kanesa o le fai’ai e fesoasoani ai i tagata e tetee atu i se tasi o ituaiga kanesa aupito ogaoga, le kanesa o le susu.
O le ausu’esu’e ua faailoa mai i le 9News ua o latou iloa o le tuufaatasia o le immunotherapy, o se ituaiga togafitiga e faaaogā ai le immune system o le tagata, lea e aofia ai sela o le tino ma totoga e puipuia ai le tagata mai le aafia i ni faama’i, e fai faatasi ma le fuālaau e igoa o le Paxalisib, e fesoasoani i le toe faaleleia o sela o le tino o le tagata ma fesoasoani ai i le tetee atu i gasegase e ono aafia ai.
Na saunoa se sui mai le vaega su’esu’e a le Queensland Institute of Medical Research, Professor Sudha Rao, o le fuālaau ua saunia ai se faamoemoe mo tagata e aafia i le kanesa o le susu e igoa o le metastic triple negative, o se tasi lea o ituaiga kanesa ogaoga ua ta’ua e mātele ina aafia ai tamaitai talavou.
Fai mai le ausu’esu’e ua o latou iloa mo le ulua’i taimi o le tuufaatasiga o ia togafitiga o le a tuuina ai se faamoemoe mo gasegase o loo aafia i tulaga ia ma itiiti avanoa e maua ai ni togafiti.
Afai ae sologa lelei le faata’ita’iga o le a faia, o lona uiga e ono aogā lea ituaiga togafiti mo isi foi kanesa ogaoga.
Mo gasegase e fia auai i le faata’ita’iga lea e ao ona faafesoota’i a latou foma’i e faia togafitiga o le kanesa.
Puna o Faamatalaga: https://www.9news.com.au/national/breast-cancer-worldfirst-aussie-trial-helps-immune-system-detect-dormant-cancer-cells/30ae3fb4-387d-4092-a714-233f1c252505
