Ua faateia Brian Tamaki I le molia o ia ona o le solo tetee na ia taitaia I le Aso Toonai

O le aso ananafi na asia ai e leoleo e toalua le fale o le taitai o le ekalesia a le Destiny ma faailoa iai le molia o ia ona ua ia soli le tulafono ua taua o le Covid-19 Health Response Act 2020 faatasi ma poloaiga o le lapataiga vaega 3 a Aukilani o loo iai

I se pepa o faamatalaga na faalauiloa mai anapo e Tamaki o loo ia taua ai lona tapena e tetee I moliaga ua faia faasaga ia te ia, ma e le o iai foi sona fefe

O le faateia o Tamaki ua ia faailoa o lea sa galulue faatasi lava ma leoleo ao tapena le faatasiga na faia, ma ua ia faailoa ai lona le fiafia I le ofisa o leoleo ma lona ia talitonuga ua mafua ona toe molia ia ona o le tele o tala a tagata lautele

O le tetee lenei na faailoa ai e le pulenuu o Aukilani, Phil Goff faapea le tamaitai palemia, Jacinda Ardern lo laua le fiafia I le soli o tapu

O le Aso Lua o le vaiaso fou o loo fuafua e tulai ai le alii faifeau I luma o le faamasinoga